Tokikom-ek eta PuntuEUS-ek lankidetza hitzarmena sinatu dute

 Gaurko Deia.com-etik ateratako notizia interesgarria.
 
PuntuEUS fundazioak eta euskera hutsezko tokiko 60 komunikabide  batzen dituen Tokikom sozietateak lankidetza hitzarmena sinatu berri  dute euskarak Interneten duen presentzia areagotzeko, .eus  domeinuaren zabalkundea sustatuz Tokikom-eko bazkide diren hedabideen  bidez.

BILBO. Josu Waliño PuntuEUS gundazioko zuzendariak eta Alaitz Artolazabal  Tokikom sozietateko zuzendariak sinatu dute bi aldeen arteko  lankidetza hitzarmena.
Horrela, akordioaren lehen emaitza herriz herriko merkatari  txikiei zuzendutako ekimen berezi bat da. Horri esker, PuntuEUS-ek  eta Tokikom-ek erraztasunak emango dizkiete merkatariei, Interneten  presentzia izateko, tokiko komunikabideen gida komertzialen bidez.
Hala, gida komertziala martxan duten toki komunikabideek aukera  eskainiko diete merkatariei, .eus domeinua 15 eurotan erosteko edo  berritzeko, gida komertzialeko haien orriarekin lotzeko. Domeinuon  merkatuko prezioa 50 eurotik gorakoa da gaur egun.
Alaitz Artolazabalek azaldu duenez, "Tokikom-ek tokian tokiko  eragileetan ditu bere erroak, eta konpromiso sendoa du tokiko  eragileekin". Bere esanetan, herrietako dendari txikiak "toki  komunikabideen aliatu naturalak" dira, eta txikiei Internetera salto  egiteko laguntza eskaintzea "poz handia" da.
Bestalde, Josu Waliñok azpimarratu du akordioak "eragin bikoitza"  izango duela. "Dendari txikien presentzia digitala .eus domeinuen  bidez bultzatuz, euskararen esparru digitala ere hedatuko dugu.  Tokikom-eko bazkideek osatzen duten sare zabala horretarako baliatzea  oso emankorra izango da gure ustez", adierazi du.
Momentuz, Zumaiako baleike.eus, Soroluzeko plaentxia.eus eta  Debagoienako goiena.eus agerkariak izango dira aitzindariak. Hala  ere, behin hitzarmena sinatuta, toki komunikabideek berehala hasiko  dira eskaintza honen berri ematen tokiko dendariei.